വിശ്വരൂപം

ഉണ്ണിയായ് ജന്മം കൊണ്ടോ-

നെങ്കിലു മോപ്പോളുടെ 

കുഞ്ഞുടുപ്പാണത്രേ ഞാ-

നെന്നും ധരിക്കാറുള്ളൂ 

പെണ്ണിനെക്കാളും മേലെ-

യാണു പൂരുഷനെന്ന 

വന്മദം മനസ്സിനെ-

യേശാത്ത കൈശോരത്തിൽ 

അന്നൊരു ദിനം ഞാനാ-

പ്പൂമുഖപ്പടിതന്നിൽ 

പൊന്നുതോഴിയാം പെങ്ങ-

ളോടൊത്തു കളിക്കുമ്പോൾ 

വന്നൊരാൾ പിതാവിനെ-

ക്കാണുവാൻ സുഹൃത്താവാം 

ഒന്നു പുഞ്ചിരിക്കൊണ്ടെൻ 

"പെണ്‍വേഷം"കണ്ടീടവേ 

കണ്ണിറുക്കിക്കൊണ്ട,ങ്ങാ-

രാഞ്ഞൂ താതൻ തന്നോ-

"ടുണ്ടു രണ്ടുപേർ മക്ക-

ളെന്നു ഞാനോർത്തീടുന്നു

മുന്നമീ മകൾ പിന്നെ 

വന്നവനല്ലോ പുത്ര-

നെന്തിപ്പോൾ കാണാകുന്നു 

രണ്ടു പെണ്‍കിടാങ്ങളെ ?"

അന്നദ്ദേഹത്തിൻ  ചോദ്യം 

കേട്ടപ്പോൾ ചുറ്റും കൂടി-

നിന്നവരെല്ലാം ചേർന്നു 

ചിരിക്കേ,നിസ്സങ്കോചം 

മണ്ണുതിന്നോന,ന്ന,മ്മ-

ക്കെന്നപോൽ, പെണ്‍കുപ്പായം 

പൊന്തിച്ചു കാണിച്ചു ഞാ-

നെൻ "വിശ്വരൂപം"മെല്ലെ !

********************