സുഹൃത്തിന്റെ സമ്മാനം
സൗഹൃദസന്ദർശനം
കഴിഞ്ഞുമടങ്ങവേ-
യാമോദത്താലെന്നുള്ളം തുള്ളുവാനൊരുങ്ങയായ്
പോരുന്നനേരം ഭാര്യ-
യ്ക്കായൊരുതുണിസ്സഞ്ചി
തോഴനെൻകയ്യിൽവച്ചു
തന്നതുകൊണ്ടായീടാം
കൂട്ടുകാരനെക്കാണാൻ
പോകുന്നനേരം വീട്ടിൽ
കൂട്ടുകാരിയോമുഖം
വീർപ്പിച്ചുകാട്ടുംനിത്യം
"വീട്ടുകാര്യങ്ങൾതെല്ലും-
നോക്കേണ്ട,കറങ്ങലാ-
ണേട്ടനിഷ്ടമാണെന്നും
ഞാനായ് മുടക്കുന്നില്ല"
ഇന്നെന്തായാലും കൊള്ളാം
പിണക്കം മാറ്റാനെന്റെ
കയ്യിലുണ്ടൊരു കാര്യം
പാചകപ്രിയയ്ക്കായി
ചെന്നുകേറിയവാറെ
വിളിച്ചൂ,കിഴിയങ്ങു
കയ്യിൽ കൊടുത്തിട്ടല്പം
തണ്ടോടെയുരച്ചൂ ഞാൻ
"നിനക്കുസമ്മാനമായ്
തന്നതാണയാൾ,പല
ഗുണങ്ങൾനിറഞ്ഞതാ-
ണീനാടൻഫലം,ധന്യേ
പരിപ്പ്,കൊപ്പക്കായ
ചേർത്തുവച്ചീടാം സ്വാദു-
പെരുക്കും കൂട്ടാൻ,പിന്നെ
മറ്റൊന്നുംവേണ്ടാചോറിൽ
ഉപ്പുചേർത്തുണക്കീടാ-
മച്ചാറും തീർക്കാം നല്ല-
തത്രെ!യാരോഗ്യത്തിന്നു-
മിരുമ്പിൻ സമൃദ്ധിയാൽ "
ഇത്തരത്തിലുള്ളൊരെൻ
വീരവാദങ്ങൾകേൾക്കെ,
കക്ഷിയാ തുണിസ്സഞ്ചി
കെട്ടഴിച്ചുത്സാഹമായ്
"നന്നുനന്നിതുനല്ല-
കാര്യമാണല്ലോ,നാളെ-
യുണ്ടാക്കാംസ്വാദേറീടും
കറിയെന്നത്തെപ്പോലെ
പോന്നാലുമെന്നോടൊപ്പം
കാണിച്ചുതരാമെന്നായ്"
വാതില്ക്കലെത്തീയവൾ
ദൂരേയ്ക്കുവിരൽചൂണ്ടി
"കണ്ടുവോ ചെറുപ്പത്തിൽ
മാതാവുനട്ടൂവൃക്ഷ-
മൊന്നിത് പേരോകേൾക്ക-
യിരുമ്പൻപുളിയത്രെ!
മഞ്ഞുകാലമെത്തുമ്പോൾ
പൂത്തിടും കായ്കൾനല്കു-
മന്നതുപറിച്ചിട്ട-
ങ്ങൊരുക്കും കറിക്കൂട്ടം"
ഞാനൊന്നുനോക്കേ,കാണ്മു
മേനിയിലരഞ്ഞാണു-
പോലല്ലോതൂങ്ങീടുന്നു
നൂറുകായകളാഹാ!
പാകമായ് പഴുത്തിട്ടു-
താഴേയ്ക്കുപതിച്ചതു
ചീയുവാൻഭാവിയ്ക്കയാ-
ണാർക്കുമേ വേണ്ടേവേണ്ടാ
അച്ചാറും,കൂട്ടാനുമായ്
വെട്ടിവിഴുങ്ങുമ്പോഴും
ശ്രദ്ധിച്ചില്ലിതേവരെ-
യിച്ചെറുമരത്തെഞാൻ
ലജ്ജിച്ചുമുഖംതാഴ്ത്തി-
നില്ക്കവേ വലുതായ
കുറ്റബോധമെന്നുള്ളിൽ
തിക്കിത്തിരക്കീട്ടെത്തി.
ഗിരിജ ചെമ്മങ്ങാട്ട്
