.ഡോക്ടര്‍ അകത്തുണ്ട്

ഡോക്ടര്‍ അകത്തുണ്ടെന്ന
 ബോര്‍ഡിന്മേല്‍  കണ്ണും നട്ടീ-

യാസ്പത്രി വരാന്തയില്‍
 കാത്തിരിക്കുന്നോര്‍ ഞങ്ങള്‍ 

ക്ഷേത്ര ശ്രീകോവില്‍ നട 
തുറന്നു തൊഴാനായി-

ട്ടാര്‍ത്തിയോടണഞ്ഞീടും
 ഭക്തവൃന്ദപ്പോലെ

മുന്നില്‍ കവാടം തുറ-
ന്നെപ്പോഴാണൊരു ദേവി 

വെള്ള വസ്ത്രവും ചുറ്റി
  ദര്‍ശനമേകുന്നതും

പുഞ്ചിരിച്ചുണ്ടിൽ   നിന്നും 
വീഴ്ത്തുന്ന പേരേതെന്നു

ശങ്കിച്ചും ജിജ്ഞാസുക്ക-
ളങ്ങിങ്ങായിരിക്കുന്നു  

കാതോര്‍ക്കയാണീ വാതില്‍-
 കരയുന്നതും നോക്കി-

യൂഴമെത്തിയില്ലെനി-
ക്കെന്നോര്‍ത്തു മടുക്കവെ 

നേരമ്പോക്കിനായ്‌ ചുറ്റു=
പാടുകള്‍ വീക്ഷിച്ചുപോ-

യോരോരോ ദീനം പിടി-
 പെട്ടോരെ കണ്ടെത്തി ഞാന്‍ 

 കയ്യോടിഞ്ഞവര്‍  കാലു-
 മുറിച്ചോര്‍ തലച്ചോറി-

നുണ്ടായോരാഘാതത്താല്‍  മെയ്യനക്കാനാവാത്തോര്‍  

സന്ധി ബന്ധങ്ങള്‍ ശോഷി-
ച്ചവശര്‍, ചക്രക്കട്ടി-

ലുന്തിയെത്തുവോര്‍ 
നാനാതരമാമനാരോഗ്യര്‍ 

ചേതനയപോയോര്‍ ചോര -
വാര്‍ന്നവര്‍ അസഹ്യമാം 

വായുപീഡയാല്‍ ഏങ്ങി-വലിപ്പോര്‍ വിറയ്ക്കുന്നോര്‍ 

വേദനയുടെ ലോകം 
നേരിട്ട് കാണ്‍കെ തല-

വേദനയൊരു പാവം
 രോഗമെന്നറിഞ്ഞു ഞാന്‍    

************
( കണ്ണാടി കാണുമ്പോൾ എന്ന  കവിതാസമാഹാരത്തിൽ നിന്ന്)

(ആനയെന്നാലും അബല തന്നെ,ഒരു ഹൈടെക് കവിത,ഡോക്ടര്‍ അകത്തുണ്ട് എന്നീ കവിതകള്‍ "കണ്ണാടി കാണുമ്പോള്‍"എന്ന കവിതാസമാഹാരത്തില്‍ നിന്ന് എടുത്തതാണ്)

      ‍