സ്നേഹച്ചട്ടം

അഞ്ചാറു മാസമായ് കെട്ടും തറിയില്‍ ഞാന്‍ 

നിന്നുസുഖിക്കുകയായിരുന്നു 

വണ്ടികണക്കായിറക്കും പനമ്പട്ട 

തിന്നു തിമര്‍ക്കുകയായിരുന്നു   

എന്നല്ല,മാമ്പഴമേറെ,ചെറുപഴം 

നന്നായ് പഴുത്തുള്ള  ചക്കപ്പഴം 

പൊന്നും കൊതിക്കുന്ന വെള്ളരിക്കപ്പഴം 

നെയ്യില്‍ കുഴച്ച ചോറീ,ന്തപ്പഴം

പുത്തന,വില്‍,തയിര്‍,തണ്ണിമത്തന്‍ നല്ല-

ശര്‍ക്കര ചേര്‍ത്തുള്ള ലേഹ്യങ്ങളും

നിത്യവും നല്കിവന്നുള്ളോരു നാഥനെ 

സത്യമായ് വന്ദിച്ചു തുമ്പിയാലെ 

---------------------------  

പിന്നെ മദകാലം തീര്‍ന്നൂ പണിക്കായി 

ചങ്ങല,യിട്ടിങ്ങു കൊണ്ടുപോന്നു 

കെട്ടി,വലിക്കേണ്ട മുട്ടികള്‍ കണ്ടുള്ളി-

ലിഷ്ടക്കേടെന്തിനോ തോന്നിപ്പോയി 

(വേനലവധി കഴിഞ്ഞു,പള്ളിക്കൂടം 

പൂകാന്‍ കിശോരര്‍ മടിക്കുകില്ലേ?

ഏറിയ നാളത്തെ മോദങ്ങള്‍ പെട്ടെന്നു-

തീരുമ്പോള്‍ മാനസം മങ്ങുകില്ലേ?)

'വക്ക' കടിക്കവേ പല്ലു,പുളിച്ചുപോ-

യൊട്ടു,ശങ്കിച്ചതെന്‍ കുറ്റമാണോ? 

'തോട്ടി,ചെവിയി,ലുടക്കിയ നോവിനാല്‍

'ചേട്ട',യായ് തീര്‍ന്നതെന്‍ ദോഷമാണോ?-
പത്തു,നൂറാളുകള്‍ വന്നു,വെറി,യേറ്റാന്‍ 
ചുറ്റിലും നിന്നതെന്‍ തെറ്റുതാനോ?
കൂട്ടത്തില്‍ നിന്നൊരാള്‍ കല്ലെറിഞ്ഞാകായ്മ-  

കൂട്ടി,യെന്നുള്ള,തസത്യമാണോ?                 

മത്തു പിടിച്ചു പുറത്തിരിക്കുന്നോനെ

മസ്തകമാട്ടി ഞാന്‍ താഴെയിട്ടു

കുത്തുവാനായ് കൊമ്പു കൊണ്ടു,കൊണ്ടില്ലൊരു

ജല്പനം വന്നെന്‍ടെ കാതില്‍ വന്നു

'വയ്'അവിടാനെ, യെന്നുള്ളൊരാജ്ഞാസ്വരം 

പയ്യെന്നു ഹൃത്തിനെ തേടി വന്നു  

ആജ്ഞ,യല്ലേറെ പരിഭവ ഖേദങ്ങള്‍ 

കോര്‍ത്തൊരാ ശബ്ദം തിരിച്ചറിഞ്ഞു 

ഓര്‍ത്തു,ഗതകാല സൌഭാഗ്യ,മെന്‍ മദം-

നേര്‍ത്തു,പെരുമുഖം പിന്തിരിഞ്ഞു 

ഈറനുറഞ്ഞൊര,ക്കണ്ണുകള്‍ കാണ്കവേ 

നീറി,യെന്നുള്ളം, ശിരസ്സുതാന്നു 

ചോറിനായെന്നെ മേയ്ക്കാന്‍ വന്ന ചെക്കനെ 

കീറിയെറിയാതെ വിട്ടുപോന്നു 

മെല്ലെ,ക്കഴുത്തിലെ ചങ്ങലയില്‍ തൊട്ടു 

കൊമ്പു,പിടിച്ചങ്ങുലാളിക്കവേ 

തെല്ലു,പേടിച്ചു,നാണിച്ചു പിന്നെ സ്നേഹ-

ച്ചങ്ങലയില്‍ ഞാന്‍ മെരുങ്ങിനിന്നു

--------------------------------------
(കണ്ണാടി കാണുമ്പോള്‍ എന്ന കവിതാ സമാഹാരത്തില്‍ നിന്ന്)             

'പെരുമുഖം' =ആനയുടെ മുഖത്തിനു പറയുന്ന പേര്.