ഞാൻ ശാന്ത അയോദ്ധ്യയുടെ മകൾ
ഞാനൊരുരാജാവിന്റെ
സീമന്തസന്താനമെ-
ന്നാകിലും,വ്യഥയേറും
ജീവിതം നയിച്ചവൾ
കേമനാം ദശരഥരാജന്നു
കൗസല്യയിൽ
ജാതയായവൾ,ശാന്ത!
ശാന്തസ്വഭാവം ചേർന്നോൾ
പുത്രിയുണ്ടായാൽ വംശം
നശിയ്ക്കും,അശുഭങ്ങ-
ളൊട്ടേറെ ഭവിയ്ക്കുമെ
ന്നാ രാജഗുരുവാക്കാൽ
ദത്തായിനൽകീ താതൻ
*അനപത്യതദു:ഖാൽ
ചുട്ടുനോവീടും,സുഹൃ
ത്തംഗരാജാവിന്നായി
പെറ്റമ്മതന്നീടുന്ന
സ്നേഹംഞാനറിഞ്ഞീല
ഉത്തമം മുലപ്പാലിൻ
സ്വാദുഞാനോർക്കുന്നീല
കൊട്ടാരക്കെട്ടിൽധാത്രി
മാരാലെ പരിചരി-
ച്ചത്രെ,ഞാൻ വളർന്നതും
യൗവ്വനംപ്രാപിച്ചതും!
മാരിയില്ലാതെ രാജ്യം
വരൾച്ച നേരിട്ടപ്പോൾ
ചേടിമാരോടൊത്തന്നു
കാട്ടിലേയ്ക്കയച്ചെന്നെ
ഋഷ്യശൃംഗനാം മുനി
യുവാവെയാകർഷിച്ചു
പട്ടണത്തിലെത്തിയ്ക്കാൻ
വർഷമുണ്ടാക്കാനുമായ്
സ്വന്തംരക്തത്തിൽ പിറ
ന്നവളാണുഞാനെങ്കിൽ
ഹന്ത!താതന'ങ്ങഴി
ഞ്ഞാടുവാ'നയയ്ക്കുമോ!
സ്വന്തമച്ഛനും,ഉപേ
ക്ഷിയ്ക്കുന്നകാലം,പിന്നെ-
യെന്തെല്ലാം വളർത്തുന്ന
താതനുമായിക്കൂടാ !വൃഷ്ടിവന്നൊരാസന്തോ
ഷത്തിലാമുനിവര്യ-
നിഷ്ടമായ് കന്യാദാനം
ചെയ്തുടൻ രാജാവപ്പോൾ
ദുർഘടമാകും കാട്ടു
ജീവിതമെനിയ്ക്കേകി
പട്ടുചേലയും പൊന്നും
കാണാത്തകിനാവായി
ചൊൽപ്പൊങ്ങുമയോദ്ധ്യയിൽ
മക്കൾ ജനിയ്ക്കാതാകേ
പുത്രകാമേഷ്ടീയാഗം
നിർവ്വഹിച്ചീടാനായി
അച്ഛനെൻ ഭർത്താവിനെ,
യാദരപൂർവ്വം,ക്ഷണി-
ച്ചെത്രയും വിനീതനാ
യെന്നതുമോർക്കുന്നൂഞാൻ
"ദൈവികമാകും പായ
സത്തിന്റെപേരുംപറ-
ഞ്ഞന്നത്തെക്കാലംനാട്ടു
നടപ്പാം*"നിയോഗ"ത്താൽ
അമ്മമാരുമായ്ചേർന്നു രമിപ്പാനെൻനാഥനെ
യെന്തുനിർഭാഗ്യം!താത-
സമ്മതമെന്തത്ഭുതം!
മറ്റൊരുനാരിയ്ക്കായി
പങ്കുവച്ചീടാൻ,തന്റെ
ഭർത്താവിനെയേതു
പെണ്ണുസമ്മതിച്ചീടും
പെറ്റമ്മയോടും, ചെറി
യമ്മമാരോടും സന്ത-
ത്യർത്ഥമൊത്തുചേരാനാ
യെങ്ങനെനല്കീടുംഞാൻ
സീതയെവാഴ്ത്തീനിങ്ങൾ
വീരമാതാവാം കുന്തീ
ദേവിയെ,പാഞ്ചാലിയെ
താരയെ,അഹല്യയെ
രാവണരാജാവിന്റെ
ജായയെ,കഷ്ടംകഷ്ട-
മീ,ദു:ഖവതിയെന്നെ
യോർത്തില്ലയാരുംതന്നെ...!
ഗിരിജ ചെമ്മങ്ങാട്ട്
*അനപത്യത =കുട്ടികളില്ലാത്ത അവസ്ഥ
* പഴയകാലത്ത് "നിയോഗ"എന്നൊരു സമ്പ്രദായമുണ്ടായിരുന്നു എന്ന് വായിച്ചറിഞ്ഞിട്ടുണ്ട്.മഹാഭാരതത്തിൽധൃതരാഷ്ട്രർ,പാണ്ഡു,വിദുരർ എന്നിവരുടെ ജനനം ഇങ്ങനെയായിരുന്നല്ലോ.
