ശ്രീ ഗുരുവായൂരപ്പന്റെ ഉച്ചപ്പൂജാലങ്കാരവർണ്ണന 120

16.09.2024

കൃഷ്ണനാട്ടംകളിവേഷത്തിലാണല്ലോ
കൃഷ്ണനെയോതിക്കനിന്നൊരുക്കി
കാലിൽതളയുണ്ട്,മീതെചിലമ്പുണ്ട്
മോടിയായ് കച്ചഞൊറിഞ്ഞതുണ്ട്

കിങ്ങിണിയുണ്ട്,ഭുജങ്ങളിൽ കാപ്പുണ്ട്
കൈവള ചേലിലണിഞ്ഞിട്ടുണ്ട്
മാറത്തുപൊന്നിന്റെമുത്താരവും,തെച്ചി-പ്പുവുണ്ടമാലയുമിട്ടിട്ടുണ്ട്

നീലക്കുപ്പായത്തിന്മേലിരുതോളീന്നും
തൂങ്ങുന്നൊരുത്തരീയച്ചാർത്തുണ്ട്
കാതിൽ,കനകത്തിൻപൂവുണ്ട്നെറ്റിയിൽ ഗോപിക്കുറിയുമണിഞ്ഞിട്ടുണ്ട്

മൗലിയിൽ കൃഷ്ണമുടിയുണ്ടതിന്മേലെ
പീലിയുണ്ട് കേശമാലയുണ്ട്
ശ്രീലകേ നെയ്നിറദീപപ്രകാശത്തിൽ
ആടാനൊരുങ്ങുന്ന ഭാവമുണ്ട്

കൃഷ്ണാഹരേകൃഷ്ണ!കൃഷ്ണാഹരേകൃഷ്ണ!
കൃഷ്ണാഹരേകൃഷ്ണ!
കൃഷ്ണ!കൃഷ്ണാ
കൃഷ്ണാ,കൃഷ്ണാട്ടത്തിൻ
ഭൂഷയണിഞ്ഞുള്ള
കൃഷ്ണാ,വണങ്ങുന്നു
നിന്നെ ഞങ്ങൾ!

ഗിരിജ ചെമ്മങ്ങാട്ട്