നിഷ്കളങ്കതയുടെ ബാല്യം

അന്നൊരു പുലർകാലം 

ഞാനുണർന്നെണീറ്റപ്പോ-

ളമ്മയെ കാണുന്നില്ലെ -

ന്നങ്ങിങ്ങു തേടീടവേ 

ചെമ്മെ വന്നെടുത്തെന്നെ 

വാരിപ്പുണർന്നെൻ ധാത്രി

അമ്മു സങ്കടപ്പെടാ-

തോതീടാ മൊരുകൂട്ടം.

അമ്മ പോയിരിക്കുന്നു

 കുഞ്ഞിന്നു കാണാൻ വാങ്ങി-

ക്കൊണ്ടുവന്നീടാനൊരു 

കുഞ്ഞനീത്തിക്കുട്ടിയെ 

കുഞ്ഞിമോളേടത്തി പോൽ

വളർന്നു വലുതായാൽ 

കുഞ്ഞോമനയ്ക്കോ കൂടെ-

ക്കളിക്കാനാളാകില്ലേ

ആയതൻ പുന്നാരച്ചൊൽ 
കേട്ടവാറെന്നുള്ളത്തി-
ലായിരം കിനാപ്പൂക്ക-
ളൊന്നൊന്നായ് വിടർന്നുപോയ് 
ആരെല്ലാമായി,പ്പങ്കു-
വയ്ക്കണമിസ്സന്തോഷ-
മോടിഞാൻ മുറ്റത്തേയ്ക്കെ-
ന്നൂഞ്ഞാലിലാടീടാനായ്‌ 

"മഞ്ഞക്കിളീ നീ കേട്ടു-
കൊൾകെനിക്കായെന്നമ്മ 
കുഞ്ഞനീത്തിയെ കൊണ്ടു-
തന്നിടും കളിക്കാനായ് 
അണ്ണാറക്കണ്ണാ കാട്ടി-
ത്തന്നിടാം നിനക്കു ഞാ-
നമ്മണിക്കിടാവിനെ
കണ്ടു നീ കൊതിക്കല്ലെ 
അമ്മിഞ്ഞയുണ്ടീടുമാ 
പൈതലിന്നരികിലായ് 
കണ്ണിമയ്ക്കാതെ കാത്തു 
നോക്കി ഞാനിരുന്നീടും 
കണ്ണെഴുതിക്കും കുഞ്ഞി-
ക്കവിളിൽ പൊട്ടും കുത്തും 
കുഞ്ഞുകുപ്പായം ചാർത്തും 
കുഞ്ഞുമെയ് നോവിക്കാതെ 
കഞ്ഞിയും ചോറും വെച്ചു 
കളിക്കും ഞങ്ങൾ കുഞ്ഞി-
പ്പെണ്ണവളോടിച്ചാടി 
നടക്കാൻ തുടങ്ങിയാൽ 
തുമ്പപ്പൂതോറും പാറി 
തേൻ കുടിച്ചീടും നീല-
ത്തുമ്പീ നീ കേൾക്കുന്നില്ലേ-
യെൻ കൊച്ചു സ്വകാര്യങ്ങൾ"

നന്മനോരാജ്യംകണ്ടു 
മൂന്നുനാൾ കഴിഞ്ഞു ഞാ-
നങ്കണ്‍ വാടിയിൽ നിന്നു 
വന്നൊരു വൈകുന്നേരം 
മെല്ലെ വന്നെന്നെ ചേർത്തു-
പുൽകിയെൻ മുത്തശ്യമ്മ 
ചൊല്ലി "നീ വരൂ വേഗം 
കുഞ്ഞിനെ കാണേണ്ടായോ 
അമ്മതൻ ചാരത്തല്ലോ 
ചായുറങ്ങുന്നൂ നിന്ടെ 
കുഞ്ഞന്യേൻ നല്ലോരുണ്ണി 
ചെന്നൊന്നു നോക്കൂ കുട്ടീ 
അമ്മിണീ നിന്നെക്കാട്ടാൻ 
കാത്തിരിക്കയാണമ്മ
കണ്മണീ കുഞ്ഞിക്കാലാ-
ലോടിയേ പോയീടാവൂ"

ഇമ്മട്ടു പിതാമഹി 
ലാളിച്ചു ചൊൽകെ തെറ്റെ-
ന്നെന്മനമിടിഞ്ഞുപോയ് 
കണ്ണുകൾ നിറഞ്ഞുപോയ് 
"ഇല്ല ഞാൻ കാണുന്നില്ല 
വേണ്ടെനിക്കനിയനെ"
ചുണ്ടും പിളുത്തിക്കൊണ്ടു 
ഞാനേങ്ങിക്കരഞ്ഞു പോയ്‌ 
"നിത്യവു,മങ്കണ്‍ വാടി 
തന്നിൽ വന്നെത്തും ചില-
ദുഷ്ടന്മാർ താന്തോന്നിക-
ളാരെയും കൂട്ടാക്കാത്തോർ 
എത്രയും കുറുമ്പന്മാ-
രാമ്പിള്ളേ,രവരെന്നെ 
കുത്തിടും മാന്തും മുടി-
പ്പിന്നൂരിപ്പൊട്ടിച്ചീടും 
എന്തിനായെനിക്കമ്മ 
വാങ്ങിക്കൊണ്ടുവന്നതി-
ക്കുഞ്ഞനെ!കിട്ടാനില്ലേ 
പെണ്‍കിടാവിനെ കഷ്ടം !
എന്നോടിത്തിരുമാലി 
പോരടിക്കില്ലേ നാളെ 
കൊണ്ടുപോയ് കളഞ്ഞോട്ടെ 
മിണ്ടില്ല ഞാനല്ലെങ്കിൽ "

കുഞ്ഞുവാശിയും കുട്ടി-
ക്കിണുക്കും കേട്ടിട്ടെന്ടെ 
കുന്തളം മിനുക്കിക്കൊ-
ണ്ടോതിയെൻ മുത്തശ്യമ്മ 
"എന്തുനീ പിണങ്ങുന്നോ 
കരച്ചിൽ നിർത്തില്ലേ കേ-
ളന്തമില്ലാതോരോന്നും 
ചിന്തിച്ചു തുടങ്ങാമോ?
ആണുങ്ങളെല്ലാം കാട്ടു-
കുറുമ്പന്മാരാണെന്ന-
പോഴത്തം നിന്നോടാരാ-
ണീവിധം ധരിപ്പിച്ചു !
പാവയും പട്ടിൻകുപ്പാ-
യങ്ങളും പഴങ്ങളും 
വാങ്ങി തന്നീടും പിതാ-
വാണെന്നോ ദുഷ്ടൻ കാവേ?
അക്ഷരം പഠിപ്പിക്കാൻ 
സല്ക്കഥ ചൊല്ലിത്തരാൻ 
മുത്തശ്ശനല്ലേ,നിന്നോ-
ടെന്തൊന്നു കുറ്റം ചെയ്തു?
കൂട്ടത്തിൽ നിന്നെ ചേർത്തു-
കൊണ്ടാടുമങ്ങേല്ലത്തെ-
യേട്ടന്മാർ റൌഡിക്കൂട്ട-
മാണെന്നു നീയോർക്കുന്നോ?
അമ്മതൻ ചാരേ ചേർന്നു-
കിടന്നു മയങ്ങീടും 
കുഞ്ഞുണ്ണി നിനക്കെന്നും 
കൂട്ടുകാരനായ് മാറും 
നന്നവൻ വരും നിന്ടെ 
പിന്നാലെ 'യോപ്പോളേ'യെ-
ന്നിമ്പമായ് വിളിച്ചീടും 
നീയന്നു വിളി കേൾക്കും"

ഈ വിധം മുത്തശ്യമ്മ 
സാന്ത്വനിപ്പിക്കെ ചുണ്ട-
ത്തോരാതെയുണർന്നൊരു 
സുസ്മിതം കണ്ണീരോടെ 
മാതൃസ്നേഹത്തിന്നുണ്മ
കൊണ്ടാവാം ചെന്നൂ ഞാനാ-
സൂതികാ ഗൃഹത്തിന്ടെ 
വാതുക്കലതിവേഗം 

അമ്മതന്നരികത്തു 
കണ്ണുകൾ ചിമ്മിക്കൊണ്ടും 
പിഞ്ചിളം കുഞ്ഞിക്കൈകൾ 
രണ്ടും ചുരുട്ടിക്കൊണ്ടും 
ഒന്നും നിനയ്ക്കാതുറ-
ങ്ങീടുമുണ്ണിതൻ നെറ്റി-
തന്നിൽ ഞാൻ നൽകീ സ്നേഹ-
മോടെയെന്നുപഹാരം .

***************

      

സരോജനി ടീച്ചർക്ക്‌ ആദരപൂർവ്വം

എത്ര ദശകം കടന്നുപോയ് ഞാനെൻടെ 

കൊച്ചുവിദ്യാലയം വിട്ടശേഷം 

എത്ര വസന്തം കൊഴിഞ്ഞുപോയ് ജീവിത-

മുച്ച തിരിഞ്ഞുപോയെത്ര വേഗം !

ഒന്നാംതരത്തിൽ 'ഹരിശ്രീ'യേകീടുവാ -

നന്നാ സരസ്വതീ മന്ദിരത്തിൽ 

അമ്മയല്ലെന്നാലുമുണ്ടായിരുന്നു പോ-

ലമ്മതൻ സ്നേഹവായ്പോലുമമ്മ 

ശിക്ഷകളെന്നിയെ നേരായ മാർഗത്തിൽ 

ശിക്ഷണം ഞങ്ങൾക്കു നൽകിയെന്നും 

കൊച്ചുകഥകളും ഗീതങ്ങളും ചേർന്ന 

ചിത്ര പാഠാവലി തന്നിൽ നിന്നും 

അന്നെന്ടെ കൈ പിടിച്ചേറ്റ മലിവു ചേർ -

ന്നൻപോടെഴുതിച്ചോരക്ഷരങ്ങൾ 

ഇന്നെന്ടെ തൂലികത്തുമ്പിൽ കവിതയായ് 

വന്നുദിക്കുന്നതെൻ ഭാഗ്യമല്ലോ?

അന്നൊരു ചാറ്റൽ മഴയേറ്റു വാതുക്കൽ 

വിങ്ങും മനസ്സുമായ് ചെന്നുനില്ക്കെ 

അന്തികേ വന്നെൻടെ കണ്ണുനീരൊപ്പിയും 

സാന്ത്വനിപ്പിച്ചും കവിൾ മുകർന്നും 

വെള്ളമിറ്റീടുന്ന കുഞ്ഞുടുപ്പൂരിയും 

നന്നായ് പിഴിഞ്ഞെൻ തല തോർത്തിയും 

കഞ്ഞിവച്ചീടുന്ന കല്ലടുപ്പിൻ ചൂടു -

തിണ്ണമേൽ തോരാൻ നിവർത്തിയിട്ടും 

ജട്ടിയിട്ടീടുന്ന ശീലമില്ലായ്കയാൽ 

'പട്ടുകോണക്കുന്തി'യായ് മാറവേ 

മൂത്തവർ നാലിൽ പഠിക്കുമേട്ടത്തിമാർ 

മൂക്കിൽ വിരൽ വെച്ച കാഴ്ച കാണ്‍കെ 

നാണവും മാരിക്കുളിരുമിടചേർന്നു 

തേങ്ങലിൻ വക്കത്തു ഞാനെത്തവേ 

സാരിത്തലപ്പു കൊണ്ടെന്നെപ്പുതപ്പിച്ചു 

ചൂടേകി ദേഹത്തു ചേർത്തണച്ചാൾ !

'ഷഷ്ഠി' തികഞ്ഞതില്ലന്നെനിയ്ക്കെങ്കിലു-

മത്ഭുത !മോർമ്മകൾ മങ്ങിടാതെ 

ഷഷ്ടിപൂർത്തിക്കൊരുങ്ങീടും പൊഴുതിലും 

ചിത്തം കുളിർപ്പിച്ചുണർന്നിടുന്നു

***************************        

ഭാഗ്യലക്ഷ്മി

നീ ഭാഗ്യലക്ഷ്മി തൊഴുത്തിന്ടെ നെയ്‌വിള -

ക്കീ ഗേഹ വൃദ്ധിക്കു നിത്യലക്ഷ്മി 

നീ ക്ഷീര വൃഷ്ടി പറമ്പിൻ വെളിച്ചമീ 

മാനുഷീധാത്രീ വളർത്തു പുത്രി 

കന്നായിരുന്ന നീയമ്മതൻ ചാരത്തു നിന്നും 

കുനികുത്തിയങ്ങുമിങ്ങും 

പുല്ലുനാമ്പോരോന്നു തിന്നും മറന്നങ്ങു 

മണ്ടുന്ന കണ്ടുമെൻ കണ്‍കുളിർത്തു 

പിന്നെ നീ പയ്യായ് വളർന്നു മദിയാർന്നു 

പൊൻകുടമൊന്നിനെ നൊന്തുപെറ്റു 

അന്നതെൻ സൌഭാഗ്യമെന്നോർത്തു ലാളിച്ചു 

നിൻ പാലനത്തിന്നു മാറ്റുചേർത്തു 

നിൻ പാൽ കറന്നു വിറ്റെൻ മുണ്ടുപെട്ടിയിൽ 

ടിന്നളുക്കിൻ കനം കൂടിവന്നു 

നിൻ നറും വെണ്ണ ചേർത്തുണ്ടെന്ടെ യോമന -

ക്കണ്ണനാമുണ്ണിക്കു മെയ് വളർന്നു 

രണ്ടുനാൾ മുൻപാണു കാലത്തു മൊന്തയും 

വെള്ളവും കൊണ്ടു നിൻ ചാരെയെത്തീ

എന്തുനീ തെറ്റെ,ന്നെണീട്ടില്ല !അകിടുണർ -

ന്നെന്തെ മാധുര്യം ചുരത്തിയില്ല !

എന്തോ പിണഞ്ഞു നിനക്കെന്നു കണ്ടുള്ളു -

മന്ദിച്ചു കണ്ണുനീർ വാർത്തു നിന്നു 

അന്തികേ ഞാനെന്തു ചെയ്യേണ്ടുവെന്നോർത്തു 

നിൻ ശോകഭാവങ്ങൾ നോക്കിനിന്നു 

ഏറും തരത്തിലായൌഷധങ്ങൾ കൂർത്ത -

സൂചിയാൽ കേറ്റീ തളർന്ന നിന്നിൽ 

നീയൊന്നെണീറ്റില്ല  നാലുപേർ തണ്ടിട്ടു -

താങ്ങിയെന്നാലതും വ്യർത്ഥമായ്പോയ്‌ 

ആരോ പറഞ്ഞറിഞ്ഞാണെന്നുതോന്നുന്ന -

താരാച്ചാരാന്മാർ മണത്തു വന്നു 

ചോരയും നീരും വികാരവും ചേർന്ന നിൻ 

ദേഹമാംസത്തിൽ കൊതിച്ചു നിന്നു 

ചില്ലറക്കാശെണ്ണി മേടിച്ചു പുത്രിതൻ 

കൊല്ലാക്കൊലയ്ക്കമ്മ കൈപൊക്കുമോ 

പുല്ലുതിന്നുന്നൊരി,സ്സാധുവിൻ ജീവനു -

മില്ലയോ മൃത്യുവിൽ ഭീതിയെന്നോ 

പാവം !തൊഴുത്തിൽ കിടപ്പു ദീനാർത്തയായ് 

കാണുവാനാവില്ല ,യെന്നൊടുക്കം

പാപമാണെന്നറിഞ്ഞിട്ടും ,ദയാവധ -

പാതകത്തിന്നായനുജ്ഞയേകി 

നീ ഭാഗ്യലക്ഷ്മി ,തൊഴുത്തിൻ വിളക്കണ -

ച്ചീ ഭാഗ്യഹീനക്കിരുട്ടു നൽകീ 

നീയാർന്നു മുക്തി പറമ്പിന്ടെയറ്റത്തു 

നീറുമീ യമ്മക്കു മാപ്പു നല്കി 

************************************        

Girija Chemmangatt
(കേരളത്തിലെ ക്ഷീരോല്പാദനത്തെ പ്രതികൂലമായി ബാധിച്ച ഒരു ദുരന്തമാണ് കന്നുകാലികളിലെ കുളമ്പുരോഗം .രോഗം ബാധിച്ച്, കുറെ മൃഗങ്ങള്‍ അവശരാകുകയും ജീവഹാനി സംഭവിക്കുകയും ചെയ്തു .നിസ്സഹായരായ ഈ മിണ്ടാപ്രാണികള്‍ക്കും,അവരെ പരിപാലിച്ച് ,ഉപജീവനമാര്‍ഗം കണ്ടെത്തിയ ഹതഭാഗ്യരായ ഗോപാലകര്‍ക്കുമായി ഞാന്‍ ഈ കവിത സമര്‍പ്പിക്കുന്നു .) 

കണ്ണന്ടെ കണ്ണൻ

കണ്ണന്ടെ പൊൻ തിടമ്പേ റ്റുവാൻ ഭാഗ്യങ്ങൾ 

കൊല്ലങ്ങളായ് ചെയ്ത കണ്ണൻ 

കണ്ണന്ടെ യാനപ്പറമ്പിൽ വെച്ചേറ്റവും 

സന്മാനോഭാവനിക്കണ്ണൻ 

 വെള്ളവിരിപ്പിലിരുത്തി മേൽശാന്തി, നിൻ 

ചെല്ലപ്പേരിട്ടു വിളിച്ചു 

അന്നുതൊട്ടുത്സവ വേള തന്നോട്ടത്തി-

ലൊന്നാമതായി ഞാനോടി 

(പെണ്ണൊരാളോടി ജയിച്ചെന്ന വാർത്ത ഞാൻ 

പണ്ടെന്നോ കേട്ടു മറന്നു 

അന്നതെൻ കൃത്യതവിട്ട മദകാല-

ബന്ധനം മൂലമായ് വന്നു )

കുട്ടിക്കുറുമ്പുകളേറെയും ചെയ്തൊരെ-

ന്നിഷ്ട ദൈവത്തിൻ നടയ്ക്കൽ 

കുട്ടിത്ത മാർന്നുള്ള കൊമ്പനെത്തന്നൊരാൾ 

പട്ടാഭിഷിക്ത സമ്പന്ന 

കൂട്ടത്തിലേറ്റ മിളയവ നെന്നോർത്തു 

ചേട്ടന്ടെ സ്നേഹവായ്പേകി 

കൂട്ടാമവരജസിദ്ധി ഞങ്ങൾക്കേറ്റം 

നേട്ടമാണെന്നായ്‌ കരുതി 

ഉത്സവനാളിൽ വരിചേർത്തു ഞങ്ങളെ 

നിർത്തി മെയ്‌ച്ചങ്ങല കെട്ടി 

മത്സരം കാണുവാൻ ഭക്തജനങ്ങളു -

മുത്സുകരായി വന്നെത്തി 

ഓടുമ്പോളിമ്പ മുതിർക്കാൻ മണിയുമായ് 

പാരമ്പര്യക്കാരുമെത്തി 

പാളിച്ച മാറ്റുവാൻ പോലീസുകാരുമി-

ക്കോവിലിൻ ചുറ്റുമായെത്തി 

ഓട്ടം തുടങ്ങി ഞാനൊന്നാമതാകുവാ-

നേറ്റം കുതിച്ചു മുന്നേറെ  

കാട്ടിയെൻ പാലകൻ,കാൽകൊണ്ടൊരാജ്ഞയെ-

ന്തോട്ടം, പിടുന്നെന്നു നിർത്താൻ!

നിന്ന ഞാൻ ചുറ്റിലും നോക്കവേ കാണുന്നു 

മുന്നിലാണോടുന്നു കുഞ്ഞൻ !

പിന്നാലെയാരും വരുന്നില്ല,പാവങ്ങൾ!

മന്ദയാനം നടത്തുന്നു !

കൊച്ചു കുറുമ്പൻ ചടുലമായോടി യ-

ങ്ങെത്തിക്കൊടിമരം തൊട്ടു 

ചുറ്റിലും കാണികളാർപ്പിട്ടു,ഞങ്ങളോ 

വിഡ്ഢികളെന്നായ് പിരിഞ്ഞു 

വന്നിതാ, ശോകവൃത്താന്തം പണമാണു

ഞങ്ങളോടിച്ചതി കാട്ടി 

പൊങ്ങു മധികാരഗർവാണു കാപട്യ-

മുള്ളൊരീ നാടകം കെട്ടി 

വെള്ളയണിഞ്ഞു വണങ്ങുവാനെത്തുന്ന

കള്ളപ്പരിഷക്കു മുന്നിൽ 

കള്ളച്ചിരിയുമായ്‌ നിൽപവൻ,പാൽവെണ്ണ -

ക്കള്ളനിന്നെന്തേ പിണഞ്ഞു? 

മഞ്ഞപ്പവൻ പൊൻ തിളക്കങ്ങൾ പാക്കനാർ 

നഞ്ഞെന്നു ചൊല്ലിയെന്നാലും 

മഞ്ഞപ്പട്ടാട ചുറ്റുന്നവൻ തൻ കണ്ണും 

മഞ്ഞളിച്ചെന്നായറിഞ്ഞേൻ.

***************

(വർഷങ്ങൾക്കുമുൻപ് ജയലളിത ഗുരുവായൂരപ്പന് നടയിരുത്തിയ ആനക്കുട്ടി,ആനയോട്ടത്തിൽ ജേതാവായപ്പോൾ ഉണ്ടായ വിവാദത്തെ അടിസ്ഥാനമാക്കി എഴുതിയത്.  
പെണ്ണൊരാളോടി ജയിച്ചെന്ന വാർത്ത ......ഗൌരി ആന ഒന്നാമതായി ഓടിവന്ന കഥ  ഓർക്കുന്നു.ശാന്തസ്വഭാവിയായകണ്ണൻ  )     

'        

യശോദ

തള്ളതൻ കുഞ്ഞി പ്പകർപ്പെന്നപോൽ കരിം-

പുള്ളി വെണ്മേനിയിൽ മിന്നുംകിടാത്തനേ 

തുള്ളും മനസ്സുമായ്,നീ വന്ന നാൾ തൊട്ടു 

നിന്നെ ലാളിക്കുവാൻ വെമ്പും യശോദ ഞാൻ 

നല്ലിളം പുല്ലും പഴത്തോലു,മുപ്പിട്ട 

കഞ്ഞിയിൽ ചാലിച്ചൊ,രെള്ളുപിണ്ണാക്കുമായ് 

എന്നും തൊഴുത്തിൽ വന്നെത്തുമ്പൊഴെന്തിനാ-

യിണ്ടലിൽ നാളെയെച്ചൊല്ലിത്തപിപ്പു ഞാൻ!

അമ്മയല്ലെന്നാലു.മോർപ്പു, വരുംകാല-

മെന്തായി മാറും വളർന്നൊരാ വേളയിൽ 

ഇല്ല നീ പോകില്ല പാടത്തു പൂട്ടുവാൻ 

യന്ത്രക്കലപ്പകളെമ്പാടുമാകയാൽ 

പെട്ടിശ്ശകടവും പിക്കപ്പു,ടിപ്പറും 

നെട്ടോട്ടമായ്‌ നിരത്തെങ്ങും നിരക്കയാൽ 

കട്ട കടവണ്ടി യോട്ടുവാൻ ,പൌരുഷം-

തട്ടിയുടച്ചു തളർത്തില്ല മാനുഷർ 

പുത്തൻ തലമുറക്കായ്‌ വിത്തുകാളയായ്

നിർത്തില്ല നിൻ ജനുസ്സത്ര പോരായ്‌കയാൽ 

വ്യർത്ഥമാണെങ്കിലും ചിന്തിച്ചു തേങ്ങുന്നു 

തപ്ത ഹൃദന്ത വൈവശ്യങ്ങളോടെ ഞാൻ 

നാളെ നീയെന്തായിടും,ഹാ !കഴിഞ്ഞൊരാ -

നാളുകൾ പേക്കിനാ,വെന്നപോൽ മാഞ്ഞിടും 

നേരും നെറിയും കളഞ്ഞുള്ള മർത്ത്യന്ടെ-

യൂണുമേശയ്ക്ക,ലങ്കാരമായ് മാറിടും !

***************

കുട്ടിച്ചെമ്പിലെ കഞ്ഞി

ഒട്ടല്ലനവധി കൊല്ലം മുന്പെൻ

  കുട്ടിക്കാലത്തില്ലത്തേ-

യ്ക്കരെ നിന്നും പൂവും കൊണ്ടൊരു 

കുട്ടിപ്പെ ണ്ണു വരാറുണ്ട്   

തെച്ചി പ്പൂങ്കുലയൊന്നൊരണ്ടോ

പച്ചത്തുളസീ ഗളമഞ്ചോ

മച്ചിലെ ദേവനു ചാർത്താനായവ-

ളെത്തും വെയിലു കനക്കുമ്പോൾ 

പട്ടിണിയുണ്ടുവളർന്നൊരു പെണ്ണി-

ന്നറ്റുകിടക്കും വയർ കണ്ടാൽ 

കഷ്ടം തോന്നി കഞ്ഞി കൊടുക്കും 

കെട്ടിൽ വിളിച്ചിട്ടെന്നമ്മ 

കുട്ടിച്ചെമ്പിലെ കഞ്ഞി കുടിച്ചൊരു 

കുട്ടിപ്പെണ്ണിൻ കഥ കേൾക്കാൻ 

കുട്ടികൾ ഞങ്ങൾ ചുറ്റും കൂടും 

മുറ്റത്തുള്ളൊരു മാഞ്ചോട്ടിൽ 

ഉച്ചക്കൊടുവെയിൽപോയാലിടവം 

കൊട്ടും കുരവയുമായ് വന്നാൽ 

കുട്ടിപ്പെ ണ്ണു വരാതാകും പുഴ 

യറ്റം മുട്ടെ യിരച്ചാർത്താൽ 

കർക്കിടകത്തിൻ കെടുതിയിൽ മുണ്ടു-

മുറുക്കി യുടുത്തൊരു കഥ ചൊല്ലാൻ 

എത്തും ചിങ്ങമണഞ്ഞാൽ വീണ്ടും 

തെച്ചിപ്പൂവിൻ കുമ്പിളുമായ്

പത്തു പണത്തിനു കൊള്ളരുതാത്തൊരു 

കുട്ടിപ്പെണ്ണോടന്നൊരു നാൾ 

കുട്ടിത്തത്തിനിളക്കം കൊണ്ടൊരു 

ദുശ്ചോദ്യം ഞാൻ ചോദിച്ചു 

"കുട്ടിപ്പെണ്ണേ നീയൊരു രൂപ കൊ-

ടുത്തൊരു ഭാഗ്യക്കുറി ചേർന്നാൽ 

പത്തല്ല മ്പതിനായിരമായ്പണ-

മൊത്താലെന്തതു ചെയ്തീടും ?"

പൊട്ടച്ചോദ്യമതെന്നാകിലുമ-

ക്കുട്ടി പ്പെണ്ണതറിഞ്ഞില്ല 

ഒട്ടും വൈകാതവളിൽ നിന്നും 

കിട്ടീ മറുപടി യീമട്ടിൽ 

   

"കുട്ടി ക്കാവിനു* സംശയമെന്തേ 

കിട്ടും ലോട്ടറി യെന്നാകിൽ 

കുപ്പാട്ടീന്നു* മനപ്പടി വരെയും 

കെട്ടും പാലം കട്ടായം 

കർക്കടകങ്ങൾ തകർത്താലും പുഴ-

മത്തു പിടിച്ചിഹ വന്നാലും 

മുട്ടില്ല ,ടിയനു* കഞ്ഞി മനക്കലെ 

കുട്ടിച്ചെമ്പിൽ നിന്നെന്നും "

പത്തുപണത്തിനുകൊള്ളരുതാത്തൊരു 
കുട്ടിപ്പെണ്ണിൻ വർത്താനം
കുട്ടികളൊത്തു കളിക്കുന്നെൻ ചെവി-
പൊട്ടും മട്ടുള്ളിടിയായി 

പൊട്ടിയിടിഞ്ഞു വിഴാറായുള്ളൊരു
പൊട്ടപ്പുര നന്നാക്കാനോ
പത്തു പറക്കണ്ടം മേടിച്ചതിൽ
മുപ്പൂവൽ കൃഷി ചെയ്യാനോ 
പട്ടും പൊന്നും വാരിയണിഞ്ഞു
പണത്തിൻ മേനിയിൽ ഞെളിയാനോ
കുട്ടിപ്പെണ്ണു കൊതിച്ചില്ല,വളിലെ
നിഷ്കാപട്യ ത്തികവാലെ 

കുട്ടിപ്പെണ്ണിൻ ചെറുമോഹത്തിൽ
ചിത്തം പാരമലിഞ്ഞിട്ടോ
ചെത്തിപ്പൂവുകൾ നിത്യം ചൂടിയ 
സൌഖ്യം നെറുകകുളിർത്തിട്ടോ
പത്തര മാറ്റിൻ വില കണ്ടിട്ടോ 
തൃപ്തി യടഞ്ഞൊരു ദേവന്മാർ 
സ്വത്തും പണവും വാരിയെറിഞ്ഞു 
ലക്ഷ്മീ ദേവിയുമൊത്തൊരു നാൾ 

ഒട്ടല്ലനവധി കൊല്ലം പിൻപീ
കുട്ടിപ്പെണ്ണിൻ നിനവിങ്കൽ 
കുട്ടിച്ചെമ്പും കെട്ടും മനയും 
സത്യത്തികവൊടു മിന്നുന്നു!

**************  

കുട്ടിക്കാവ് -  നായർസ്ത്രീകൾ നമ്പൂതിരി പെണ്‍കുട്ടികളെ വിളിക്കുന്ന പേര്
കുപ്പാട് ,കുപ്പമാടം- വീട് (ആചാരവാക്ക്)
അടിയൻ- ഞാൻ (ആചാരവാക്ക് ) 

പുത്രൻ

ഭീതി പൂണ്ടന്ത്യത്തിന്ടെ

 കാലൊച്ച കേട്ടും കൊണ്ടീ

ഗൂഢമാം കശാപ്പുശാ-

ലക്കകം നിൽപാണു ഞാൻ

യാതൊരു മാർഗേനയൊ-

ന്നറിയിച്ചിടും പുതു -

ജീവനൊന്നുള്ളിൽ സുപ്തി-

 കൊണ്ടിരിപ്പതാം കാര്യം

പുല്ലുമേയുവാൻ പോയ-

താണെന്നാ,ലാരും കണ്ടി-

ല്ലുന്നത,നാരോഗ്യവാ-

നായുള്ള വൃഷാര്യനെ

ഗംഭീര ഭാവം ചേർന്ന

 കൊമ്പുകൾ, മൃദുമേനി 

ചന്തമുള്ളവന്നൊത്ത-

 പൂഞ്ഞ, ഭംഗിയുള്ള വാൽ

കോൾമയിർ കൊണ്ടീടുക-

യാണു ഞാൻ പ്രേമം കൊണ്ടീ-

യോർമ്മ വന്നിടും നേരം

 ,മൃത്യു കാത്തു നില്ക്കിലും

ചോർന്നുപോം കാലം വീണ്ടു-

കിട്ടില്ല ,ജീവൻപോലു -

മൂർന്നു പോകാറായ്‌ നാളു-

ണ്ടെത്ര !അല്ല നാഴിക !

 കണ്ണുനീർ പൊഴിക്കുവാ-

നാകില്ല  നരവർഗ-

പ്പെണ്ണല്ല ,  നാവോ മർത്യ-

ഭാഷയ്ക്കു വഴങ്ങില്ല 

ഉള്ളം വിങ്ങിടും നെരി-

പ്പോടുപോ,ലെരിഞ്ഞാകെ -

പ്പൊള്ളുവാൻ മാത്രം വിധി-

പ്പെട്ടുള്ള മിണ്ടാപ്രാണി 

എത്ര പേറു പെറ്റു ഞാൻ

 പാലെത്ര ചുരത്തിയെൻ 

കർഷക വൃത്തൻ യജ-

മാനന്നു വേണ്ടിപ്പണ്ടേ 

"വൃദ്ധയായിവൾ ഇനി-

യൊന്നിനും കൊള്ളാത്തോളായ്

വിറ്റു കാശാക്കാ"മെന്നു

 നിർദ്ദയം വിചാരിച്ചോ 

ജീവനെ,പ്പേറീടുമെ-

ന്നു,ദരം വീർക്കാൻ ഹേതു 

ജീവാവസാനത്തിന്നു

 വന്ന രോഗമായോർത്തോ 

ദൂരങ്ങളെമ്പാടും ഞാൻ

 താണ്ടി യാതനയെന്തു -

മാതിരി യനുഭവി,ച്ചി-

വിടം വരേക്കെത്തി !

ആരും കേൾക്കുവാനില്ലെൻ

 രോദന,മെന്നുള്ളൊരെൻ-

രോദനം വിധാതാവിൻ

 കർണ്ണത്തിൽ പതിഞ്ഞുവോ 

നോവുണർന്നുവോ പുറം-

 തടവാനദൃശ്യയായ് 

ദേവി പാർവതി ദയാ-

 വായ്പോടെ വന്നെത്തിയോ 

ദിവ്യത്വം നിറഞ്ഞൊരാ-

 സ്പർശ സാന്ത്വനങ്ങളിൽ 

നവ്യമാ മുണർവ്വോടു-

 മൽപവേദനയോടും 

മഞ്ജുള സ്വരൂപനാം

 മൂരിക്കുട്ടനെ,പ്പെറ്റി-

തമ്പരപ്പുമായ് ചുറ്റു-

 മാരാച്ചാരാന്മാർ നില്കെ 

പിച്ച വെച്ചുമീ കുഞ്ഞി-

ക്കുളമ്പു വഴുക്കുമ്പോൾ 

വേച്ചുമെൻ പാലൂറീടു-

മകിടിൽ മുട്ടിക്കൊണ്ടും 

അച്ഛന്ടെ,യാകാരത്തിൽ

 വന്നവൻ നീയമ്മക്കു 

തുച്ഛമായെന്നാകിലു-

മായുസ്സു നീട്ടിത്തന്നു 

                             ***************                            

(കശാപ്പിന് കൊണ്ടുവന്ന പശു പ്രസവിച്ചു എന്ന പത്രവാർത്തയെ ആസ്പദമാക്കി എഴുതിയത്.മിണ്ടാപ്രാണികൾക്ക് പ്രസവവേദന വരുമ്പോൾ ശ്രീപാർവതി പുറം തടവാനെത്തും എന്ന് ഗ്രാമീണ സങ്കൽപം.)