Wednesday 6 March 2013

അറസ്റ്റ് വാറണ്ട്

അമ്പല മുറ്റത്തൊ രാള്‍ക്കൂട്ട മാരവ -
മെന്തെന്ന,റിഞ്ഞിടാന്‍ ചെന്നു 
അഞ്ചാറു പേരുണ്ടു പോലീസുവേഷത്തില്‍ 
വണ്ടി യൊന്നോടിച്ചു വന്നു !

പെട്ടെന്നു തെറ്റും ഗജത്തെ തലേക്കെട്ടു -
കെട്ടിച്ച,യക്കാതിരിക്കാന്‍ 
പുത്തനാം ചട്ട,മൊന്നു,ണ്ടാക്കി സര്‍ക്കാരു -
മത്തേഭ പാലകര്‍ക്കായി 

മത്ത,ടിച്ചാര്‍ക്കുന്ന വാരണം നിര്‍ദ്ദയം 
മര്‍ത്യനെ,ക്കൊന്നു,വെന്നാകില്‍ 
തെറ്റെ,ന്ന,റസ്റ്റുവാറണ്ടുമായ്  ചെന്നുട-
മസ്ഥനില്‍ കുറ്റങ്ങള്‍ ചാര്‍ത്താം 

ദേവന്ടെ,യാനയാ,ണിന്നലെ,സ്സന്ധ്യയ്ക്കൊ-
രാളിനെ,ക്കൊമ്പത്തു കോര്‍ത്തു !!
തേവരാ,ണെന്നോര്‍ത്തു മാനിക്കണോ?
'കാട്ടുനീതി' യില്‍ ഭേദങ്ങള്‍ വേണോ?

കോവിലില്‍ നിന്നും മൃദുസ്മിതം ചെയ്തിങ്ങു 
ഗോവിന്ദ,നെത്തുമോ നേരായ് !
കോലക്കുഴല,ണി ക്കൈകളില്‍ ചേരുമോ  
കാരിരുമ്പിന്‍ വിലങ്ങിപ്പോള്‍ !!

+++++++++++++
(കാട്ടുനീതി വനനിയമം) 

No comments:

Post a Comment