ഒരു കറിക്കുറിപ്പ്...

ഇരിമ്പകത്തിൻപുളിയെന്നുകേട്ടാൽ
ചുളിഞ്ഞിടുംനെറ്റിചിലർക്കുപണ്ടേ
കറിയ്ക്കുചേരും,*ജലപുഷ്പമൊത്തെ-ന്നറച്ചിടുന്നൂ,ബത!യോഗ്യരായോർ

പരിപ്പു,വേവിച്ചതിൽകുമ്പളങ്ങ
നുറുക്കുചേർക്കാം'പുളി'യോടുകൂടി
കുറച്ചുനേരത്തിനൊരാവികേറ്റാം
അരയ്ക്കണംജീരകമൊത്തുതേങ്ങ

കറിക്കുപാകത്തിനുവേണമുപ്പു-
മെരിയ്ക്കുവേണ്ടും മുളകുംമറക്കാ
അരപ്പുചേർത്തല്പമിളക്കിടേണം
ഗുണങ്ങളെല്ലാമൊരുമിച്ചുചേരാൻ


തിളച്ചുവെന്താൽതവിചൂടുകേറ്റി-
ത്തുളിച്ചിടാം *കേരജതൈലമല്പം
മണംപരത്തുംകറിവേപ്പുപത്രം
കുറച്ചുമാത്രംകടുകും,വറക്കാം

വിശന്നിരിയ്ക്കുമ്പൊഴുതങ്ങു,ചെന്നു-
വിളമ്പണംചോറൊടുചേർത്തുകൂട്ടാൻ
രുചിയ്ക്കൊരല്പം കടുമാങ്ങയാകാ- മൊരിറ്റുതൈരും,ശുഭസദ്യപിന്നെ....

                      **********
*ജലപുഷ്പം=മത്സ്യം

ഗിരിജ ചെമ്മങ്ങാട്ട്