അതിഥി

അന്യഗൃഹത്തിലതിഥിയെത്തീടവേ-
യെല്ലാർക്കുമന്നവൻ "താര"മാകും
രണ്ടുനാൾപോകിലോ മാറീടുമദ്ദേഹ-
മെന്തൊരു'ഭാര'മിതെന്നമട്ടിൽ

നാലുനാൾചെന്നെന്നുവച്ചാൽപതുക്കവേ
'കീട'മായീടുമേ,ശങ്കവേണ്ട
ഏറെപ്പഴകവേ വെണ്ണയും നാറിടും
കേറിവന്നോനുമതേവിധത്തിൽ

ദേവനെപ്പോലാം*ഗൃഹാഗതനെന്നത-
ന്നോലയിലാരോ കുറിച്ചതത്രെ!
ഓർക്കേണമെന്നുംവിരുന്നുപോംനേരമീ-
വാക്കുകൾ,മൂത്തവർചൊല്ലതെന്നായ്...🤭😅😂

ഗിരിജ ചെമ്മങ്ങാട്ട്

(അതിഥിയും വെണ്ണയും പഴകുന്തോറും അഴുകും)
*ഗൃഹാഗതൻ=അതിഥി

 ബർത്ത്ഡേ ഗിഫ്റ്റ്...

കുട്ടന്റെ ജന്മനാളിങ്ങു-
വന്നെത്തീപൊടിപൂരമായ്
വർണ്ണചിത്രങ്ങളോടൊപ്പം
ബലൂണുകളുമേറെയാം

പേരുകൊത്തിയകേയ്ക്കെത്തി
തിരിയഞ്ചുമതുംശരി
സമ്മാനപ്പൊതിയുംകൊണ്ടു
വന്നെത്തീകൂട്ടുകാരഹോ!

മൂർച്ചയില്ലാത്തപ്ലാസ്റ്റിക്കിൻ-
കത്തിയാലതിമോദമായ്
മുറിച്ചൂ കേയ്ക്കു,മറ്റുള്ളോർ
പാടീയാശംസ,തല്ക്ഷണം

അമ്മയ്ക്കുമച്ഛനും പിന്നെ
വന്നോർക്കുംകേയ്ക്കുനല്കയായ്
തിരിച്ചും വാങ്ങിനാൻമെല്ലെ-
യതല്ലോപതിവെപ്പൊഴും

ലഘുഭക്ഷണമെല്ലാരും
കഴിച്ചൂരുചിയോടുടൻ
പിരിയാൻകാലമായപ്പോൾ
കൈകൊടുത്തുകുലുക്കയായ്

വിരുന്നുവന്നോർപോയപ്പോ-
ളെടുത്തൂ ഗിഫ്റ്റുപായ്ക്കുകൾ
തുറന്നുനോക്കീ,തോഷത്താ-
ലോതീ,അച്ഛനൊടിങ്ങനെ
"പത്തുസമ്മാനമുണ്ടച്ഛാ
കാണാൻഭംഗിയെഴുന്നതായ്
കാറും,തീവണ്ടിയും,ബൈക്കും
റോബോട്ടും,ലോറിയൊന്നതും"

എല്ലാംനോക്കിരസിക്കുമ്പോൾ
വന്നൂ,കുട്ടനൊരൈഡിയ
"അടുത്തകൊല്ലമാവട്ടെ
നൂറുപേരെ വിളിച്ചിടാം!! "
🤭😅😂

ഗിരിജ ചെമ്മങ്ങാട്ട്

 സതീ...

ഗുരുവായൂരെത്തി തൊഴുതുനില്ക്കയാ-

ണൊരുവളെന്നുടെ പ്രിയതോഴി 

അവളെയെന്നെന്നും സുഖമായ് വാഴുവാൻ 

മുരവൈരേ സ്വാമീ കനിയേണേ...

പലതാം ദുർഘടവഴികൾ താണ്ടിയാ-

ണെഴുപതിലെത്തിയവളിപ്പോൾ 

പുതുതാ,മാവാസസദനത്തിലെത്തി-

ച്ചിരകാലംവാഴാൻകൊതികൊൾവൂ!

മകനുണ്ടല്ലൊരാൾ ജനനിതന്നിഷ്ടം 

മുറപോലെചെയ്യാനൊരുഭാഗേ 

സഹജനോടൊത്തുനില്ക്കുന്നൂ,പെങ്ങൾ 

മറുഭാഗേ,പൂർണ്ണമനമോടെ 

നവമാം ഗേഹത്തിൽപലരെക്കണ്ടീടാം

സഖിയെക്കൂട്ടാനെന്നറിവൂഞാൻ

മൃദുഹാസംതൂകി ചേർന്നുപോയീടാൻ

വിരുതുമുള്ളവളാണല്ലോ

കരളിൽസംഗീതമുണ്ടു ഭംഗിയി-

ലതുപാടാനുള്ള കഴിവുണ്ട് 

കലയുമുണ്ടു,കൈവേലയുമുണ്ട്

തനുവിനാരോഗ്യമതുമുണ്ട് 

*തുനിവുനല്കുവാൻ ശാസ്താവുമുണ്ട് 

കനിവേകീടുവാൻ പെരുവനേ-

മരുവും ഗൗരീശനുണ്ടു,കണ്ണനോ

ഗുരുപുരിയിങ്കൽ നില്പുണ്ട് 

തരിപോലുമീഷൽ മനതാരിലില്ലാ-

തവിടെ ചെല്ലണം വൈകാതെ

നിവസിച്ചീടേണംസാമോദംനീയാ

സദനേ,വിശ്രാന്തശാന്തയായ്...❤️❤️

 ഗിരിജ ചെമ്മങ്ങാട്ട്

തുനിവ്...ധൈര്യം

 നഷ്ടബോധം...

നാല്പതാണ്ടുകൾമുമ്പേ ഞാൻ
കേട്ടതാണീ ചിരിക്കഥ
നാലുമാസംമുമ്പുള്ളി-
ലെഴുതാൻവന്നൊരാശയം
കുത്തിക്കുറിച്ചിടാനന്നേ
തോന്നാഞ്ഞതു കഷ്ടമായ്
"ഇച്ചമ്മ"കണ്ടുവായിച്ചാ-
ലിഷ്ടപ്പെട്ടു ചിരിച്ചിടും
മക്കളോടൊത്തുചേർന്നിട്ടു
സൂപ്പറെന്നുകമന്റിടും
ബുദ്ധിമോശമിതെന്നോർത്തു
ദു:ഖിയ്ക്കുന്നതു നിഷ്ഫലം
ഇത്രവേഗമിഹംവിട്ടു-
പോകുമെന്നോർത്തതില്ല ഞാൻ
കുത്തുന്നു കുറ്റബോധത്തിൻ
കൂരമ്പെൻ മനതാരിതിൽ...😔😔

      ഗിരിജ ചെമ്മങ്ങാട്ട്

 മോന്ത..

"മോന്ത"യെന്നചുഴലിക്കുഭൂഷയായ്
ന്യൂനമർദ്ദമഴയാർത്തിരമ്പവേ
ശാന്തയായ്ഭവനവാസമെന്നിയേ
മോന്തവീർത്തുമരുവുന്നതെന്തുഞാൻ

ഗിരിജ ചെമ്മങ്ങാട്ട്.

 കണ്മണിക്ക്...

കണ്മണീനിന്നുടെപെൺകൊടയെങ്കിലും
നിന്നെ കൊടുക്കുകയല്ലഞങ്ങൾ
സുന്ദരമായൊരുദാമ്പത്യജീവിതം
നൽകുന്നൊരാളുമായ്ചേർക്കയാണേ

ചാരിക്കിടക്കുന്നൊരുമ്മറവാതിലാ
പാദത്താൽതള്ളിത്തുറന്നിടേണം
കേറണംമെല്ലെ,ഗൃഹാംഗങ്ങൾതന്നുടെ
ചേതസ്സിലും,രാഗഭാവമോടെ

നെല്ലു,മരിമാവും
ചേർത്തണിഞ്ഞുള്ളൊരാ
*പല്ലക്കിലേറിയിരിക്കുന്നേരം
പൊന്മണീയോർക്കണമെല്ലാരുമേ,നിന്നെ
മന്നവിപോലെ കരുതുമെന്നായ്

എന്തിനുമേതിനുംകുറ്റംപറയുന്നൊ-
രമ്മായിയമ്മയവിടെയില്ല
ഉള്ളുംപുറവുമൊരുപോൽപുതുമക-
ളുള്ളവളാണേ,അവന്റെയമ്മ

ചാരുകസേരമേൽ ഗർവ്വിച്ചിരിക്കുന്ന
രാജാവേയല്ല,അവന്റെയച്ഛൻ
ചേരണമൊട്ടുംമടിയാതെ നല്ലൊരു
തോഴനായിത്തന്നെകണ്ടിടേണം

പാദംവണങ്ങുകയില്ലനിൻദേവരൻ
ത്രേതായുഗത്തിലെലക്ഷ്മണനായ്
കാണണമെന്നുമനിയനായ്ത്തന്നെനീ
പോരടിച്ചീടൊല്ലവനുമായി

നിന്റെ വലത്തുകാലില്ലത്തുവയ്ക്കുന്ന
സുന്ദരയാമമെത്തീടുമ്പൊഴേ
നിന്നെയല്ലോ,നല്ലതോഴിയാക്കീടുവാ-
നെന്നെന്നുംമോഹിപ്പൂ,കൊച്ചുപെങ്ങൾ
രണ്ടുകയ്യുംനീട്ടി സ്വീകരിച്ചീടണം
നല്ലൊരേട്ടത്തിയായ് മാറിടേണം
എന്നുമവൾക്കൊരുകൂട്ടായിരിയ്ക്കേണ-
മെന്നുമവൾക്കൊരുതാങ്ങാകേണം...

കൂടുമ്പോളിമ്പംനിറയ്ക്കുന്നതാണല്ലോ
ന്യൂജനറേഷൻകുടുംബമിപ്പോൾ
നീയുമവനൊത്തുജീവിച്ചുകാട്ടണം
മാതൃകയാകേണമേവർക്കുമേ

പെൺകൊടയെന്നുകേൾക്കുമ്പോൾഭയന്നിടും
പണ്ടത്തെപ്പാവങ്ങൾപെൺകിടാങ്ങൾ
ഇന്നത്തെ കന്യമാരെല്ലാംസ്വതന്ത്രമാം
ചിന്തകളുള്ളവരത്രെപാരിൽ!

ഗിരിജ ചെമ്മങ്ങാട്ട്

                           ******

*ആന്തോളം(പല്ലക്ക്) അണിയുക

 സമന്വയം...2025

കന്നിമാസമാദ്യവാരമങ്ങുഭൂവിലെത്തവേ
നന്നുനന്നൊരുത്സവക്കൊടിക്കുകൂറനീർന്നിടും
അന്നുപെരുമ്പാവുപുരേവന്നിടുന്നുഭാർഗ്ഗവീ-
മണ്ണിലുള്ളഭൂസുരർ,കുടുംബമൊത്തുസർവ്വരും

രണ്ടുനാളൊരല്ലലുംപെടാതെചേർന്നുവാഴുവാ-
നുള്ളിൽമോഹമോടെ,സൗഹൃദങ്ങൾവീണ്ടുമാർന്നിടാൻ
പൂണുനൂലുമാത്രമല്ല,ശക്തിതന്റെവാളുമായ്
പോരുതീർക്കുവാൻനമുക്കു,സാദ്ധ്യമെന്നുകാട്ടുവാൻ

ആരുമേ,കുറച്ചുകണ്ടിടേണ്ട,ഞങ്ങളെന്തിനും-
പോരുവോരുമല്ലി,നൃത്ത,ഗാന,കാവ്യശാലികൾ
വേദിതോറുമാടി,കാണികൾക്കുമോദമേകുവോർ
മോടിയോടെവന്നവർക്കു,വിസ്മയങ്ങൾനല്കുവോർ

നാളെനാളെയെന്നുകാത്തിരുന്നിടാം"സമന്വയം"
മേളകണ്ടിടാനൊരുങ്ങിടാം,മുദാപുറപ്പെടാം
പോരുവിൻ,വരാതിരിക്കവേണ്ടതെല്ലുതാമസം
കൂടിടാം രസിച്ചിടാം നമുക്കുരണ്ടുവാസരം

                    **************
           ഗിരിജ ചെമ്മങ്ങാട്ട്.