ശ്രീ ഗുരുവായൂരപ്പന്റെ

ഉച്ചപ്പൂജാലങ്കാരവർണ്ണന 155
26.02.2025

മത്സ്യാവതാരസ്വരൂപത്തിൽ,കോവിലിൽ
കൃഷ്ണകുമാരനെയിന്നുകാണാം
താഴേയ്ക്കുമീനത്തിൻരൂപവും,മേലേയ്ക്കു
നാരായണപ്രഭൂഭാവംപൂണ്ടും

പൊന്നിൻചെതുമ്പലും,വാലും തിളങ്ങുന്ന
മിന്നൽക്കസവാൽ പതിച്ചിട്ടുണ്ട്
പട്ടുപുടവഞൊറിഞ്ഞതിൽകിങ്ങിണി
വെട്ടിത്തിളങ്ങിലസിക്കുന്നുണ്ട്

മാറത്തുസ്വർണ്ണപ്പതക്കങ്ങൾകാണുന്നു
മാങ്ങാമാലാച്ചന്തംചേർന്നുകാണ്മൂ
ഓടിക്കിതച്ചെന്റെ മഞ്ജുളകോർത്തൊരു
പൂമാലവേറെയുമിന്നുകാണ്മൂ!

കൈവള,കേയൂരം,കാതിപ്പൂവൊക്കെയു-
മഞ്ജനവർണ്ണനണിഞ്ഞിട്ടുണ്ട്
മാലേയംചാർത്തിയതൂനെറ്റി,ഗോപിയാ-ലേറെപ്രകാശിച്ചുകാണുന്നുണ്ട്

പൊന്നിൻകിരീടവും,ചേണാർന്നമാലയും
പങ്കജനേത്രനണിഞ്ഞിട്ടുണ്ട്
കണ്ണിൽകരുണയും,ചുണ്ടിൽചിരിപ്പൂവു-മിന്നു,ശ്രീകാന്തൻനിറച്ചിട്ടുണ്ട്

തൃക്കൈകൾനാലിലും,ശംഖുചക്രം,ഗദ,
പദ്മവും ദേവൻ ധരിച്ചിട്ടുണ്ട്
ഭക്തരെയെല്ലാമനുഗ്രഹിച്ചീടുവാൻ
പദ്മനാഭസ്വാമി നില്ക്കുന്നുണ്ട്!

നാരായണാ!ഹരേ!നാരായണാ!ഹരേ!
നാരായണാ!ഹരേ!നാരായണാ!
നാരായണാ!ഹരേ!നാരായണാ!ഹരേ!
നാരായണാ!ഹരേ!നാരായണാ!

ഗിരിജ ചെമ്മങ്ങാട്ട്.