ശ്രീ ഗുരുവായൂരപ്പന്റെ ഉച്ചപ്പൂജാലങ്കാരവർണ്ണന 49

07.04.2024

വായുപുരത്തിൻഗേഹത്തിൽ ചെന്നാൽ

കാണാമൊരുകുഞ്ഞിക്കൃഷ്ണൻ

കാലൊന്നുമെല്ലെച്ചെരിച്ചും തള

കാണുന്നപോലെപ്പിണച്ചും

കോണകം ചാർത്തിയിട്ടുണ്ട് കുമ്പ-

മേലൊരു കിങ്ങിണിയുണ്ട്

കാതിൽപ്പൂവുണ്ടുചെവിയിൽ ചേലി-

ലോമൽക്കുടക്കുണുക്കാണോ

മാറിൽ ചിലമാലകാണാം പിന്നെ

വേറെക്കഴുത്തിലും കാണാം

വെള്ളമന്ദാരത്തിൻപൂവാൽ തീർത്തൊ-

രുണ്ടപ്പൂമാലയും കാണാം

തങ്കവളകൾകിലുങ്ങും കൈകൾ

രണ്ടിലുമായൊരുവേണു

പുഞ്ചിരിച്ചുണ്ടത്തുചേർത്തു നാദം

തഞ്ചത്തിലൂതുന്നകാണാം

ചന്ദനംചാർത്തുംമുഖരം പൊന്നിൻ 

മിന്നുന്നഗോപിയിൽകാണാം

പീലിക്കിരീടത്തിൻമേലെ കാണാ-

മേറെ പ്രിയംചേർന്നമാല

മേലെയലങ്കാരമാല ക്കീഴിൽ

ദീപത്തിൻപുണ്യപ്രഭയിൽ

രണ്ടുവയസ്സായൊരുണ്ണി വേണു-

മന്ദംവായിക്കുന്നകാണാം

കൃഷ്ണാഹരേജയ കൃഷ്ണാ

കൃഷ്ണാഹരേജയ കൃഷ്ണാ

കൃഷ്ണാമുകിൽവർണ്ണ കൃഷ്ണാ

കൃഷ്ണാഗോവിന്ദഗോപാലാ

ഗിരിജ ചെമ്മങ്ങാട്ട്