ശ്രീ ഗുരുവായൂരപ്പന്റെ ഉച്ചപ്പൂജാലങ്കാരവർണ്ണന 83

11.05.2024

വെണ്ണയുണ്ണുന്നൊരുണ്ണിയായിന്നതാ

കണ്ണനെകളഭത്തിൽമെനഞ്ഞതായ്

കണ്ടിടാംഗുരുവായുപുരേ,കീർത്തി-

പൊങ്ങിടുന്നൊരാശ്രീലകമെത്തുകിൽ 

തൃപ്പദമിടതൊന്നുമടക്കിയാ,

തൃത്തുടമേലെവെണ്ണക്കുടവുമായ് 

ആർത്തിയോടെനവനീതമുണ്ണുന്നു

*ആർത്തിനാശകനായുള്ള മാധവൻ 

കാൽത്തളയുണ്ട്,കാപ്പുണ്ട്കൈകളിൽ 

നേർത്തകുമ്പമേലുണ്ടതാകിങ്ങിണി 

പട്ടുകോണകമുണ്ടുചരടിലായ്

നിത്യവുമുടുക്കുമ്പോലെചന്തമായ്

കുഞ്ഞുമാറത്തുകാണ്മുപതക്കത്താൽ 

മിന്നിടുന്നൊരുമാല,കഴുത്തിലോ, 

കണ്ടിടുന്നു വളയത്തിന്മാലയും 

കണ്ണനിന്നെത്രസുന്ദരക്കുട്ടനായ്!

തോളിലുണ്ടേവളകളും,കാതിലോ

ഗോപികളാണുസ്വർണ്ണവർണ്ണത്തിലായ് 

ഗോപിയുണ്ടുതിരുനെറ്റിമേലതും 

കാണുന്നല്ലോകനകവർണ്ണത്തിലായ്

പൊൻകിരീടത്തിലുണ്ടുമയിൽപ്പീലി 

ഭംഗിചേരുന്നകേശമാല്യങ്ങളും 

കണ്ണനുണ്ണിത*ന്നാസ്പദേകാണുന്നു 

വർണ്ണമേറുംവനപുഷ്പമാലയും 

"ഉണ്ടതാണുണ്ണിയെങ്കിലുംവേണമേ 

വെണ്ണ!എന്നമ്മയേകൂ,മറക്കൊലാ"

ചൊല്ലിടുന്നതുകേട്ടു,യശോദാമ്മ

കുഞ്ഞനിന്നു,കൊടുത്തുവെണ്ണക്കുടം!

കൃഷ്ണകൃഷ്ണാഹരേകൃഷ്ണമാധവാ 

കൃഷ്ണകൃഷ്ണാമുരാന്തകാകേശവാ 

കൃഷ്ണകൃഷ്ണാ*മധുസൂദനാർച്ചിതാ

കൃഷ്ണകൃഷ്ണാമധുസൂദനാഹരേ

ഗിരിജ  ചെമ്മങ്ങാട്ട് 

*ആർത്തി=ദു:ഖം

*ആസ്പദം=ദേഹം

*മധുസൂദനാർച്ചിതൻ=മധുസൂദനനാൽഅർച്ചിക്കപ്പെട്ടവൻ