ദശപുഷ്പമാല

ഇലക്കീറിലിരിക്കുന്ന കറുകക്കൂട്ടത്തിൽനിന്നും

മിടുക്കികൾ മൂന്നുപേരെന്നരികിലെത്തി

ഇലക്കഷ്ണം വാട്ടിക്കീറി,ച്ചുരുട്ടിനൂലാക്കിമെല്ലെ

ദശപുഷ്പമാലകെട്ടൂ ഞങ്ങളെച്ചേർത്ത്

ചിരിച്ചുകൊണ്ടവരെഞാ,നോമനിച്ചുനൂലിൽചേർക്കെ

വരുന്നുമൂന്നുപേർവീണ്ടും ചെറൂളയൊത്ത്

നിറഞ്ഞുള്ളൊരാമോദത്താലവരെയുംകോർക്കെ പൂവ്വാം-

കുരുന്നില കൃഷ്ണക്രാന്തീസമേതമെത്തി

മുരാരിയെസ്മരിച്ചുഞാനവരേയുംകൂടെക്കൂട്ടെ

വരുന്നു മുക്കുറ്റി മുയൽച്ചെവിയുമൊത്ത്

നിലപ്പന കയ്യുന്നിയാംതോഴിയുമായ്,നാണത്തോടെ-

യടുത്തുവന്നപ്പോ,ളൻപുചേർത്തുവെച്ചൂഞാൻ

ഉഴിഞ്ഞതിരുതാളിമാരെവിടെപ്പോയെളിച്ചെന്നോ

തിരഞ്ഞപ്പോൾ മടിച്ചെന്റെയരികിൽവന്നൂ

കൊറോണക്കാലമെന്നാലു,മകലങ്ങൾ പാലിയ്ക്കേണ്ട

മഴയത്തുനിൽക്കുംനിങ്ങൾ ശുചിത്വമുള്ളോർ

കഥയെല്ലാംകണ്ടുനിൽക്കേ കറുകനാമ്പുകൾമൂവ-

രൊരുമയോടടുത്തെന്റെ വിരലിൽ തൊട്ടു 

ദശപുഷ്പമാല ചമച്ചിലയിൽപൊതിഞ്ഞൂനാളെ

പുലർച്ചയ്ക്കു കുളിച്ചുവന്നെടുത്തുചൂടാൻ

                        ***********

ഗിരിജ ചെമ്മങ്ങാട്ട്