ശ്രീ ഗുരുവായൂരപ്പന്റെ ഉച്ചപ്പൂജാലങ്കാരവർണ്ണന 69

27.04.2024

കാളീന്ദിതീരത്തെയാലിൻകൊമ്പത്തതാ 

കാൽതൂക്കിയിട്ടങ്ങിരിക്കുമ്പോലെ 

ഓതിക്കൻകൃഷ്ണനാണല്ലോകളഭത്തി-

ലോമനക്കണ്ണനെയിന്നൊരുക്കി 

കാലിൽതളയുണ്ട്,കൈകളിൽകാപ്പുണ്ട്

കോടിപ്പുതുപട്ടുകോണമുണ്ട് 

പൊന്നരഞ്ഞാണം കുടപ്പനോടിന്നതാ 

പൊന്നരതന്നിലായ്ക്കാണുന്നുണ്ട് 

കുഞ്ഞുനെഞ്ചത്തൊരുസ്വർണ്ണമാല,പിന്നെ 

കുഞ്ഞിക്കഴുത്തോടുചേർന്നമാല 

നന്ത്യാർവട്ടപ്പൂവും തെച്ചിപ്പൂവും ചേർത്തു 

ചന്തത്തിൽ കോർത്തൊരു വന്യമാല

കർണ്ണത്തിലുണ്ടുതിലകക്കുറി,നെറ്റി-

തന്നിലുംകാണുന്നുഭംഗിയോടെ 

മിന്നുംകളഭക്കിരീടത്തിൽപീലികൾ 

സുന്ദരക്കുട്ടനണിഞ്ഞിട്ടുണ്ട് 

വെള്ളമന്ദാരത്തിരുമുടിമാലയും

അഞ്ചാറലങ്കാരമാലയുമായ് 

ഊണുംകഴിഞ്ഞാലിൻകൊമ്പത്തിരിപ്പതായ് 

ശ്രീലകേവാഴുന്നുനന്ദപുത്രൻ

ഗോപികൾതീരത്തുവെച്ചപൂഞ്ചേലകൾ

മാമരക്കൊമ്പത്തു  തൂക്കിയിട്ട്

മായച്ചിരിയോടെ,ഞാനല്ലയെന്നായി

വേണുവിളിച്ചിരിക്കുന്നു കൃഷ്ണൻ

കൃഷ്ണാഹരേജയ കൃഷ്ണാഹരേജയ 

കൃഷ്ണാഹരേ മായാജാലക്കണ്ണാ 

കൃഷ്ണാഹരേജയ കൃഷ്ണാഹരേജയ 

കൃഷ്ണാ യശോദയ്ക്കുചേർന്നപുത്രാ 

ഗിരിജ ചെമ്മങ്ങാട്ട്