ശ്രീ ഗുരുവായൂരപ്പന്റെ ഉച്ചപ്പൂജാലങ്കാരവർണ്ണന 78

06.05.2024

നാലുതൃക്കൈകളിൽശംഖു,ചക്രംഗദാ-

താമരയേന്തിയകൃഷ്ണനിന്ന്

വായുപുരത്തിലെ ഗർഭഗൃഹത്തിങ്കൽ 

നാരായണപ്രഭുരൂപേനില്പൂ 

തൃപ്പദേകാണാംതളകളോ,പാണിയിൽ 

വെട്ടിത്തിളങ്ങുന്ന കങ്കണങ്ങൾ 

പട്ടുകസവിന്റെ ചേലഞൊറിഞ്ഞിട്ടു

തറ്റുടുത്തിട്ടുണ്ട് ഭംഗിയോടെ 

കിങ്ങിണിയുണ്ടതിന്മേലെ,കഴുത്തിലോ 

കണ്ഠാഭരണമണിഞ്ഞിട്ടുണ്ട് 

മാറിലോ,മുല്ലപ്പൂമൊട്ടിന്റെമാലയും 

കോമളഗാത്രനണിഞ്ഞിട്ടുണ്ട് 

കാതിലെപ്പൂക്കളും,ഫാലക്കുറികളും 

ചാരുതയോടെവരഞ്ഞിട്ടുണ്ട് 

മൗലിയിലുള്ളമകുടത്തിലുണ്ടല്ലോ 

*വൃന്ദയുംതെച്ചിയുംചേർന്നമാല

താമരപ്പൂക്കളും തെച്ചിയുംചേർന്നല്ലോ 

മേലെയലങ്കാരമായിക്കാണ്മു 

വക്ഷസ്സിലുണ്ടുവനമാല,തെച്ചിയും 

തൃത്താവുമൊത്തുചമച്ചുകൊണ്ട്

ശംഖുചക്രംഗദാപദ്മങ്ങളേന്തിയി-

ന്നമ്പലേദർശനഭാഗ്യമേകി

വന്നുനില്പല്ലോ,മഹാവിഷ്ണുഭക്തർക്കു

സർവ്വസുഖങ്ങളുമാശംസിക്കാൻ

നാരായണാഹരേ നാരായണാഹരേ 

നാരായണാഹരേ നാരായണാ 

നാരായണാഹരേ നാരായണാഹരേ 

നാരായണാഹരേ നാരായണാ 

ഗിരിജ ചെമ്മങ്ങാട്ട് 

*വൃന്ദ=തുളസി